20 FYSIOTERAPEUTEN 1/25 VITENSKAPELIG ARTIKKEL Fysioterapeutar sine erfaringar med Sterk og stødig for heimebuande eldre – ein kvalitativ studie Sammendrag Hensikt: Å undersøkje fysioterapeutar sine erfaringar med å rekruttere, lære opp og rettleie frivillige instruktørar som skal ha ansvar for å leie Sterk og stødig-treningsgrupper som ein del av kommunen sitt fallførebyggande tilbod til heimebuande eldre. Metode: Fire individuelle djupneintervju med fysioterapeutar tilsett i ulike kommunar vart analysert med systematisk tekstkondensering. Funn: Fem tema vart funne: (1) Ei naturleg rolle som skapar variasjon i arbeidskvardagen, (2) Rekruttering – ei ny rolle, (3) Frivillige som brubyggjarar for kunnskapsformidling, (4) Kontinuerleg rettleiing for å sikre riktig dosering og (5) Sterk og stødig for målgruppa? Studien syner at opplærings- og rettleiingsrolla i Sterk og stødig vart opplevd som naturleg, og prega av tryggheit, kompetanse og ei positiv haldning til å arbeide førebyggande med målgruppa. Frivillige instruktørar fungerte som kunnskapsformidlarar om trening og fallførebygging til gruppedeltakarane. Å rekruttere eigna frivillige instruktørar var essensielt for både treningseffekt og drift av tilbodet, men var også ressurskrevjande for fysioterapeutane. Synet på å inkludere deltakarar utanfor målgruppa varierte. Konklusjon: Fysioterapeutane opplever at arbeidsoppgåver knytt til Sterk og stødig integrerast naturleg inn i eiga rolle. Trass krevjande rekrutteringsarbeid, vert samarbeidet med frivillige gruppeinstruktørar ein viktig ressurs i det fallførebyggande arbeidet. Å finne gode løysingar knytte til rekrutteringsarbeid er sentralt. Nøkkelord: Fysioterapi, fallførebygging, Sterk og stødig. Ane Brekke, BSc. fysioterapeutkandidat, Høgskulen på Vestlandet og Steinkjer kommune. Bård Erik Bogen, fysioterapeut, PhD. Førsteamanuensis, Høgskulen på Vestlandet. Ingebjørg Kyrdalen, fysioterapeut, PhD.-stipendiat og fagkonsulent Nasjonalt senter for aldring og helse. Lill Anette Juvik, PhD.-stipendiat og høgskulelektor, RN, Helse Førde og Høgskulen på Vestlandet. lill.anette.juvik@helse-forde.no. (Korresponderende forfatter). Denne vitenskapelige artikkelen er fagfellevurdert etter Fysioterapeutens retningslinjer, og ble akseptert 5. november 2024. Ingen interessekonflikter oppgitt. Kyrdalen er tilsett i Nasjonal senter for aldring og helse, som har fagleg ansvar for Sterk og stødig. Kyrdalen har bidrege med ide og utforming og kritisk revisjon av innhald. Artikkelen ble først publisert på www.fysioterapeuten.no. Innleiing Samstundes med at det vert fleire eldre i befolkninga fører nedgang i fødselstala til færre arbeidstakarar som kan ivareta framtidas helsetenester [1]. Frivillig innsats kan spele ei viktig rolle for å møte behova som følgje av endra demografi i Noreg, særleg i lys av reformer som Leve heile livet og Bu trygt heime, der tiltak for å styrke eldrehelse og fremje aktiv aldring er sentrale [1, 2]. Nasjonale faglege råd for fallforebygging vektlegg styrke- og balansetrening for heimebuande eldre som eit viktig strategisk tiltak [3], og fysioterapeutar spelar ei nøkkelrolle i å førebyggje funksjonssvikt og fall hos heimebuande eldre [4]. Fleire treningsprogram har vist seg effektive i å førebygge fall hos eldre [5, 6]. Sterk og stødig (S&s) er eit treningsprogram som bygger på Otago Exercise Programme (OEP), eit av programma med best evidens for førebygging av fall hos eldre [7]. I ein norsk studie har OEP vist seg å vere meir effektiv i grupper enn som heimetrening [8]. S&s er eit førebyggande gruppetreningstilbod som vert leia av frivillige instruktørar [9]. Målgruppa for treningsgruppene er heimebuande eldre over 65 år som kjenner seg ustø eller har begynnande funksjonssvikt [10]. Treningsgruppene møtast ein gang i veka, med anbefalt eigentrening utanom [11]. Ein norsk studie viste at deltakarane i gruppetilbodet S&s fekk betring i fysisk funksjon gjennom ein 12-vekers treningsperiode, utan skilnad i effekt mellom ein og to treningsøkter per veke [12]. Fysioterapeutar tilsette i kommunale fysioterapitenester eller frisklivssentralar har ansvar for opplæring og rettleiing av frivillige instruktørar etter å ha gjennomført kurs for å bli S&s-rettleiarar. Sertifiserte rettleiarar held instruktørkurs for frivillige ved å bruke kursopplegg og materiell utvikla for S&s, og dei følger opp og rettleiar instruktørane regelmessig etter oppstart [10]. S&s-rettleiar skal observere
RkJQdWJsaXNoZXIy MTQ3Mzgy